Eg kjem ikkje over det

Eg kjem ikkje over det. I dag hadde eg ei nærmast spirituell teknologisk oppleving. I masteroppgåva mi skal eg altså skriva om Frode Gryttens reportasjekunst, og i samband med det var eg på Universitetsbiblioteket og spurde korleis eg kunne få fatt på BT-artiklar frå tidleg 90-tal. Jau, det skulle ikkje vera vanskeleg, Bergens Tidende var digitalisert i fleire tiår bakover i tid. Det var berre å gå inn på ein nett-database ved namn atekst.no. Hmmm! Og så gjekk eg i gang med den møysommelege prosessen med å søka etter reportasjar der Gryttens namn dukka opp, og kopiera dei enkeltvis over i eit anna vindauga. Men så fann eg ein avansert søkefunksjon, der eg kunne søka på forfattar, og vips, hadde eg Frode Gryttens samla journalistiske forfattarskap samla i eit søk framfor meg. Men best av alt, ein umiskjenneleg LAGRE-knapp var å sjå like til høgre for den nyfunne skatten. Og så var det berre å lagra alle dei 749 artiklane Grytten skreiv i BT i ei enkelt tekst-fil på 13 MB og lasta ho opp på min eigen studentportal! Og no i kveld har eg kopiert teksten over til Microsoft Reader-format og lasta han over på PDA-en. Og så er det berre å gjenta same prosessen viss det skulle vera andre journalistar ein har spesielt sansen for. Alle dei største norske avisene er søkbare… Eg kjem ikkje over det!